ShQO-da 8000 tekshe metr qar kóshkini jasandy jolmen túsirildi
ÓSKEMEN. QazAqparat - Shyǵys Qazaqstan «Qazseldenqorǵaý» mekemesi men oblystyq tótenshe jaǵdaılar departamentiniń mamandary kóshkin túsýi múmkin aımaqta jasandy jarylystar júrgize bastady, dep habarlaıdy QazAqparat tilshisi.
«Óskemen-Gornaıa Ýlbınka-Severnoe» baǵytyndaǵy joldyń 30-37 shaqyrymynda qar kóshkinin jasandy jolmen túsirý sharalary júrgizildi. Aldyn alý sharalary eki birdeı bólikte ótkendikten atalmysh jolda qozǵalysqa ýaqytsha shekteý qoıylǵan bolatyn.
«Jasandy jolmen túsken qardyń kólemi 8000 tekshe metrdi qurap, joldy tutastaı jaýyp qaldy. Arnaıy tehnıkalar joldy túske deıin arshyp úlgerdi. Saǵat 12.30-da kólik qozǵalysy qaıtadan qalpyna keltirildi» - delingen TJD baspasóz qyzmeti taratqan aqparatta.
Jasandy jarylys kezinde eshkim zardap shekken joq. Oblystyń taýly aýdandarynda kóshkin qaýpi bar. Sondyqtan tótenshe jaǵdaı mamandary qarly jotalarǵa shyqpaýǵa keńes beredi. Al «Qazseldenqorǵaý» mekemesi kún saıyn qardyń qalyńdyǵyn ólshep, monıtorıng júrgizip otyr.
Mamandar kóshkinnen saqtanýdyń tómendegideı erejelerin usynady:
1. Tolassyz qar jaýǵannan keıin 2-3 kún boıy taýǵa shyqpaý qajet.
2. Taýda júrgende aınalańyz aıqyn kórinetinine kóz jetkizińiz. Tuman kóshkin qaýpin arttyrýy múmkin.
3. Kóshkin qaýpi bar degen aýmaqtan shýlamaı, aıqaılamaı ótý qajet.
4. Qary ketpegen taýdyń mańynda aıaldap, shatyr tigýge bolmaıdy.
5. Kóshkin qaýpi bar aýmaqta kólik qańtarýdan aýlaq bolyńyz.
