ShQO-da 80 myńnan astam bala vaktsınanyń eki komponentin saldyrdy

ÓSKEMEN. QazAqparat – Shyǵys Qazaqstan oblysynda 80 myńnan astam bala koronavırýsqa qarsy Pfizer vaktsınasynyń eki komponentin saldyrdy, dep habarlaıdy QazAqparat tilshisi.

Aımaq boıynsha COVID-19 ınfektsııasyna qarsy vaktsınanyń birinshi komponentin 917 292 adam, al ekinshi komponentin 907 168 adam aldy. Bul jaıly onlaın formatta ótken baspasóz máslıhaty barysynda ShQO Sanıtarlyq-epıdemıologııalyq baqylaý departamenti basshysynyń orynbasary Ǵalymbek Alın málim etti.

«Qarasha aıynan bastap 12-18 jas aralyǵyndaǵy balalar, júkti jáne bala emizetin áıelder Pfizer vaktsınasymen egilýde. Búginde atalǵan sanattaǵy 89 034 adam ekpeniń eki komponentin saldyrǵan. Onyń ishinde 80 371 jasóspirim, 2 000 júkti jáne 6 663 bala emizetin áıel», - dedi ol.

Vaktsına alǵan adamdarda jaǵymsyz reaktsııalar tirkelmegen. Epıdemıologtar men ımmýnologtardyń pikirinshe, revaktsınatsııa ekinshi ekpeni alǵan kúnnen bastap 6 aıdan keıin «omıkron» shtamynan qorǵanýǵa kómektesedi.

Sońǵy málimetterge sáıkes, oblysta 329 926 turǵyn koronavırýsqa qarsy revaktsınatsııadan ótti.