ShQO-da 780 áıel dekrettik tólemdi arttyrý úshin jeke kásipker retinde tirkelgen – Antıkor
ÓSKEMEN. KAZINFORM – Shyǵys Qazaqstan oblysynda Antıkor 780 áıeldiń dekrettik tólemdi arttyrý úshin jeke kásipker retinde tirkelgenin anyqtady.
QR Sybaılas jemqorlyqqa qarsy is-qımyl agenttigi ShQO boıynsha departamentiniń málimetine súıensek, bala kútip júrgen keıbir shyǵysqazaqstandyq áıelder dekrettik tólem mólsherin arttyrý úshin jeke kásipker retinde tirkelgen. Al bosanǵannan keıin birden kásibin jaýyp tastaǵan.
Máselen, Óskemen qalasynyń turǵyny shashtaraz qyzmetin kórsetemin dep kásibin tirkedi. Sóıtip áleýmettik aýdarymdardy kóbeıtip, 2 mln teńgege jýyq dekrettik tólem aldy. Al bala týǵannan bir aı ótken soń kásibin japty.
«Tólem alýdyń osyndaı mehanızmin oblys boıynsha 780 áıel iske asyrdy. Olar jeke kásipker retinde 1-den 5 aıǵa deıin ǵana tirkelip turǵan. Bul faktilerden biz belgili bir sybaılas jemqorlyq táýekelderin kórip otyrmyz. Óıtkeni jeke kásipkerler óz jumysyn birden toqtatyp jatyr. Sondyqtan osy máseleni zań sheńberine sáıkes qaraý kerek», - dedi departament basshysy Denıs Shakenov.
Eske salsaq, osyǵan deıin ShQO-da bilim salasynda 220 mln teńge zańsyz tólengeni habarlanǵan.
