ShQO-da 746 túlek «Altyn belgi» ıegeri atandy
ÓSKEMEN. QazAqparat – Shyǵys Qazaqstan oblysynda 8204 oqýshy mektep bitirdi, dep habarlaıdy QazAqparat tilshisi.
Bul jaıly aımaq basshysy Danıal Ahmetov Facebook -tegi jeke paraqshasynda jazdy.
«Qymbatty túlekterdi, qurmetti ustazdar men ata-analardy oqý jylynyń aıaqtalýymen shyn júrekten quttyqtaımyn! El tarıhynda alǵash ret karantın jaǵdaıynda onlaın formatta sońǵy qońyraý merekesin ótkizdik. Bıyl oblys boıynsha 8204 oqýshy ómiriniń jańa kezeńine aıaq basqaly otyr. Onyń ishinde 746 «Altyn belgi» jáne 447 úzdik attestat ıegerleri bar. Halyqaralyq, respýblıkalyq zııatkerlik týrnırlerdiń júldegerleri, ǵylymı konkýrstardyń jeńimpazdary atanǵan túlekterimizdi zor maqtanyshpen shyǵaryp salamyz. Búginniń ózinde ShQO-nyń eń talantty oqýshylary elimizdiń jáne álemniń bedeldi oqý oryndarynan shaqyrtý aldy», - deıdi ákim.
Onyń aıtýynsha, ustazdar men ata-analardyń úzdiksiz eńbeginiń arqasynda qashyqtan oqytý jaǵdaıynda 4 toqsan laıyqty deńgeıde aıaqtaldy.
«Osy rette, sizderge erekshe alǵysymdy bildirgim keledi. Qıyn sátte balalarymyzǵa kórsetken qoldaýymyz, tanytqan túsinistigimiz, bildirgen senimimiz olardyń jiger-qaıratyn janyp, bolashaǵynyń berik irgetasyn qalaıdy», - dedi Danıal Ahmetov.
