ShQO-da 74 eldi mekenge tasqyn qaýpi tónýi múmkin
ÓSKEMEN. QazAqparat - Tótenshe jaǵdaı ókilderi Shyǵys Qazaqstan oblysynda qansha eldi mekenge qaýip tónýi múmkin ekenin aıtty, dep habarlaıdy QazAqparat tilshisi.
Byltyrǵy kóktem shyǵysqazaqstandyqtardyń esinen kete qoıǵan joq. Daıyndyq qazirdiń ózinde qyzý júrip jatyr. Tasqynǵa osal degen oryndarda aryqtardy arshý, qar tazalaý jumystary jandandy. Al sý bógetteri men ózenderdiń jaǵasy bekemdelýde. Beti qalyń qatqan ózenderde jýyq arada muz jarý sharalary uıymdastyrylmaq.
«Qardyń qalyńdyǵy jyldyq mólsherden asyp ketken. Sınoptıkter áli de qar jaýady dep otyr. Tek topyraqtyń tońy byltyrǵydaı tereń emes. Tasqyn qaýpi 74 eldi mekende saqtalady. Aldyn alý sharalarynyń arqasynda 14 eldi mekenniń daıyndyǵy tas-túıin deńgeıge jetti. 12 eldi mekende qaýip deńgeıi báseńdetildi» - delingen tótenshe jaǵdaılar jónindegi departamenti taratqan aqparatta.
Oblys boıynsha osy daıyndyqtardy pysyqtaıtyn 6 jedel top qurylǵan. Al sý sorǵysh tehnıkanyń sany byltyrǵydan úsh esege artqan. Byltyrǵy jaǵdaıdan keıin respbýlıkalyq bıýdjetten de, jergilikti qazynadan da qajet tehnıka men qutqarý quraldaryn alýǵa qarajat bólingen bolatyn.
ShQO tótenshe jaǵdaılar departamenti jumyldyrǵan kúsh 1000 adamnan asyp otyr. 300 júrdek tehnıka, 60 júzý quraly, 10 tikushaq pen 1 ushaq saqadaı saı tur.
