ShQO-da 70 jastaǵy oqýshy qyrkúıekte partaǵa otyrmaq

ÓSKEMEN. QazAqparat – Shyǵys Qazaqstan oblysyndaǵy túzetý mekemesinde 70 jastaǵy sottalǵan azamat qyrkúıekten bastap partaǵa otyryp, bilim alady, dep habarlaıdy QazAqparat tilshisi.

ShQO boıynsha QAJ departamenti baspasóz qyzmetiniń málimetine súıensek, bıyl óńir boıynsha túzetý mekemelerinde jazasyn ótep jatqan 240 adam qyrkúıekte mektep oqýshylary sekildi algebra, geometrııa, fızıka syndy pánderdi oqıdy.

Máselen, №18 túzetý mekemesinde 49 oqýshy bar. Onyń ishinde eń kishisi 20 jasta, al eń egdesi 70-te. Olardyń barlyǵy orta bilim týraly attestat alǵysy keledi.

Sottalǵandardyń biri ómirinde bar bolǵany 8 synypty aıaqtaǵanyn aıtty. Qazir ol aýyr qylmys jasaǵany úshin jazasyn ótep jatyr. Bir jylyn túrmede ótkizgen er adam endi 7 jyldan keıin bostandyqqa shyǵady. Sol kezde qolynda attestat bolǵanyn qalaıdy.

«Kolonııaǵa túsetinderdiń kóbi mektepti aıaqtap úlgermegen. Sol úshin olarǵa osyndaı múmkindik jasalyp otyr. Bul sottalǵandardyń bilim alyp, erteń bostandyqqa shyqqannan keıin qoǵamǵa ońaı beıimdelýine múmkindik beredi», - deıdi atalǵan túzetý mekemesi bastyǵynyń orynbasary Qadirhan Hamzın.

Keıbir túrmelerde mektepterden bólek kolledjder de bar. Atap aıtqanda, №16, 17, 18 jáne 22 mekemelerde arnaýly bilim alýǵa bolady.