ShQO-da 7 qurylys kompanııasy úleskerlerden zańsyz qarajat tartqan
ÓSKEMEN. KAZINFORM — Shyǵys Qazaqstan oblysynda úleskerlerden zańsyz qarajat tartqan kompanııalar jaýapqa tartyldy.
Óńirde jeke ınvestıtsııalar esebinen kópqabatty turǵyn úılerdiń qurylysy qarqyndy júrip jatyr. Alaıda qurylys kompanııalarynyń arasynda úleskerlik qarajatty zańsyz tartqandar anyqtaldy. Bul týraly ShQO Óńirlik kommýnıkatsııalar qyzmetinde ótken baspasóz máslıhatynda oblystyq Memlekettik sáýlet-qurylys baqylaý basqarmasy basshysynyń orynbasary mindetin atqarýshy Álisher Kenjehanov málimdedi.
— «Turǵyn úı qurylysyna úlestik qatysý týraly» zań talaptaryn buzǵany úshin 7 qurylys kompanııasy ákimshilik jaýapkershilikke tartylǵan. Zań buzýshylyqtar 8 nysanda tirkelgen. Atap aıtqanda, «Dala SK Group» JShS — «Ray Residense» turǵyn úı kesheni, «Elit Stroy Group» — «Park Line» jáne «Renesans 3» turǵyn úı kesheni, «Baiterek Invest» JShS — «Tumar Towers» turǵyn úı kesheni, «Cronus Stroy» JShS — «Viva Park» turǵyn úı kesheni, «Royal Finance Group» JShS — «Cristal» turǵyn úı kesheni, «MRS Company» JShS — «Grand Residense» turǵyn úı kesheni, «Premıým Stroı NS» JShS — «MUZTAU» turǵyn úı kesheni, — deıdi ol.
Óz sózinde ol keıbir kompanııanyń úleskerlermen jasasatyn kelisimsharttaryn «brondaý kelisimsharty» nemese «páter brondaý» degen ataýmen rásimdeıtinin, bul da zańǵa qaıshy bolýy múmkin ekenin jetkizdi.
Zańǵa sáıkes, úleskerlerdiń qarajatyn tartýdyń tek úsh joly qarastyrylǵan:
— «Qazaqstandyq turǵyn úı kompanııasy» AQ-nyń kepildigi arqyly;
— Ekinshi deńgeıli bank arqyly joba iske asyrylǵan jaǵdaıda;
— Kópqabatty turǵyn úıdiń qańqasy turǵyzylǵannan keıin ǵana qarajat tartýǵa bolady.
— Osy úsh tásilden tys kez kelgen basqa shema zańǵa qaıshy. Búgingi tańda «Qazaqstandyq turǵyn úı kompanııasy» portalyndaǵy derekterge sáıkes, ShQO-da tek eki turǵyn úı kesheni ǵana resmı kepildikke ıe. Olar «JANYM» turǵyn úı kesheni (A jáne B bloktary), «Diamond» turǵyn úı kesheni, — deıdi Álisher Kenjehanov.
Eske salsaq, osyǵan deıin Shyǵys Qazaqstannyń eki aýdanynda salynyp jatqan áýejaı qurylysynyń qarqyny qandaı ekendigi jaıly jazǵanbyz.