ShQO-da 655 mektepte IT-synyptar ashyldy
ÓSKEMEN. QazAqparat - Shyǵys Qazaqstannyń jalpyǵa bilim beretin barlyq mektepteri IT-synyptarmen jabdyqtalýda, dep habarlaıdy QazAqparat tilshisi.
«Meniń mektebim» óńirlik jobasy aıasynda ótken jyly tolyq jıyntyqty 277 mektep Nazarbaev zııatkerlik mektebiniń standarty boıynsha pándik kabınettermen, zamanaýı ІT jáne robot tehnıkasymen jabdyqtalǵan bolatyn.
Endi olardyń qataryna shaǵyn jıyntyqty 378 mektep qosylady. Qazir atalmysh bilim oshaqtaryn ІT-synyppen jabdyqtaý jumystary aıaqtalýǵa jaqyn. Ol úshin oblys bıýdjetinen 900 mıllıon teńge bólingen.
Al qyrkúıekte barlyq shalǵaı aýyldardaǵy shaǵyn mektepterde 500 aktıv-panel ornatylmaq. Olar sońǵy tsıfrlyq tehnologııalar negizinde, oqýshylarǵa jaratylystaný pánderin erkin jáne sapaly meńgerýge tolyq múmkindik beredi.
«ІT-synyptarda baǵdarlamalaý jáne modeldeý» pánine oqytý úshin Semeı qalasynyń Elektrotehnıka kolledji bazasynda oblystyń shaǵyn jıyntyqty mektepterdiń 573 muǵalimi arnaıy kýrstyq daıyndyqtan ótti. Barlyq muǵalimder ádistemelik quraldarmen, arnaıy baǵdarlamalarmen qamtamasyz etildi. Bul aýyl balalary úshin baǵdarlamalaý, 3D modeldeý jáne mehatronıkany oqyp úırenýdiń jańa múmkindikterin ashady» - deıdi oblys ákiminiń orynbasary Ásem Núsipova.
Búgingi tańda óńirdegi shaǵyn jıyntyqty mektepterde 25 myń bala bilim alyp júr.
