ShQO-da 600-ge jýyq memqyzmetshi turǵyn úı kezeginde zańsyz turǵan
Óńir prokýratýrasynyń málimetinshe, búginde oblysta baspana kezeginde 19 605 adam tur. Baspanaǵa muqtaj tulǵalardy tekserý kezinde memlekettik jáne bıýdjettik salanyń 600-ge jýyq qyzmetshisi turǵyn úı kezeginde zańsyz esepte turǵany anyqtalǵan.
«Atap aıtqanda, olardyń 6-ýynyń turaqty turýǵa basqa elderge kóship ketkeni, 164-iniń turǵylyqty jeri boıynsha turaqty tirkeýi bolmaǵany, 107-siniń menshiginde jeke úıleri bolǵany, 283 tulǵa basqa oblystarda turyp jatqany anyqtaldy. Mysaly, prokýratýra qyzmetkerleri úı kezeginde turǵan 1 memlekettik qyzmetshi úsh jyldan astam elordada turatynyn jáne memlekettik qyzmette emes, JShS-da jumys isteıtinin anyqtady. Osyǵan qaramastan, ol áli kúnge deıin Óskemende páter kezeginde turǵan», - dep habarlady ShQO prokýratýrasynan.
Atalmysh mán-jaılar qoldanystaǵy zańnama normalaryna sáıkes, osy tulǵalardy tizimnen alyp tastaýǵa quqyq beredi. Sondyqtan, oblys prokýratýrasy zańbuzýshylyqtardy joıý týraly usynys engizdi. Kináli laýazymdy tulǵalar tártiptik jaýapqa tartyldy.
«Qazirgi kezde oblysta «Múgedek balalary bar otbasylar» sanatynda 761 januıa esepte tur. Onyń 47-sinde balalar kámelettik jasqa tolǵan. Zańnama normalarynyń joqtyǵyna baılanysty osyndaı otbasylardy turǵyn úımen qamtamasyz etý múmkin emes. Qoldanystaǵy zańnamaǵa sáıkes, 18 jasqa tolǵan tulǵalar qaıtalap esepke turýy tıis», - delingen habarlamada.