ShQO-da 60-tan astam mekeme karantın talabyn buzǵan
ÓSKEMEN. QazAqparat – Shyǵys Qazaqstan oblysynda sanıtarlyq talaptardyń saqtalýyn tekserý maqsatynda úsh kúnde 200-ge jýyq mekemege reıd júrgizildi. Olardyń arasynda saýda oryndary, qyzmet kórsetý nysandary men mektepke deıingi uıymdar bar, dep habarlaıdy QazAqparat tilshisi.
Oblystyq Taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, 6-8 maýsym aralyǵynda óńirde 62 zańbuzýshylyq anyqtalǵan. Reıd barysynda 120-dan astam dúken men azyq-túliktik emes saýda orny, 5 shashtaraz, 4 balabaqsha, 20 demalys bazasy, 3 dárihana sondaı-aq qonaqúıler, dámhanalar, poshta bólimsheleri jáne memlekettik organdar tekserildi.
«8 maýsymda 29 obektide 38 zańbuzýshylyq anyqtaldy. Onyń ishinde 28 jaǵdaı – sanıtarlyq-dezınfektsııalyq rejımniń buzylýyna, 8-i – maska rejımin buzý jáne jeke qorǵanys quraldarynyń bolmaýyna, 2-eýi – tamaq ónimderin qaptamaǵa salmaı saqtaýǵa qatysty. Barlyq kásip ıelerine eskertý jasalyp, túsindirý jumystary júrgizildi», - delingen habarlamada.
Arnaıy qurylǵan mobıldi toptar tekserý jumystaryn ary qaraı jalǵastyra bermek.
Esterińizge sala ketsek, osyǵan deıin ShQO-da 18-31 mamyr aralyǵynda 300-den astam nysan sanıtarlyq normalardy saqtamaǵandyǵy habarlandy.
