ShQO-da 60 myń gektardan astam jer memleketke qaıtaryldy
ÓSKEMEN. QazAqparat - Shyǵys Qazaqstanda jer zańnamasyna qatysty talaptardyń oryndalýyna baılanysty júrgizilgen tekserýden soń aýyl sharýashylyǵyna qajetti 63,2 myń ga jer memleketke qaıtaryldy, dep habarlaıdy «QazAqparat».
Baspasóz máslıhaty barysynda jerdi paıdalaný men qorǵaýdy baqylaý basqarmasy bastyǵynyń mindetin atqarýshy Meıirhan Áshimbaev myńnan astam tekserý júrgizilip, negizinen jer zańnamalaryn buzý áreketteri Semeı qalasynda, Besqaraǵaı, Shemonaıha jáne Abaı aýdandarynda anyqtalǵandyǵyn aıtty.
Áshimhanovtyń sózinshe, zań buzýshylarǵa aıyp salyp, 3 aıdan 1 jylǵa deıin tıisti ýaqyt berilip, osy ýaqyt aralyǵynda olar jiberilgen kemshilikterdi joıýlary kerek. Tıisti maqsatyna saı paıdalanylmaı kelgen nemese jerdi paıdalanýda zań buzý áreketteri týraly málimetter 10 ese kóp kólemde salyq salý úshin Memlekettik kirister departamentine joldanady.
«Sot sheshimimen tárkilengen jerdi qospaǵanda Úrjar aýdanynda 60 myń gektar jer memleket ıeligine qaıtaryldy»,-dedi Meıirhan Áshimhanov.
Ol sonymen qatar 2016 jyly Ulan men Úrjar aýdandarynyń aýmaǵynda rekreatsııalyq aımaqtarda memlekettik baqylaý júrgizilgendigin aıtty. Sonda Sıbın ózeniniń boıynda kólemi 37,01 ga bolatyn 261 jer telimderi paıdalanýsyz jatqandyǵy anyqtaldy. Alakóldiń jaǵalaýynda kólemi 67,2 ga bolatyn 10 jer telimi paıdalanýsyz jatqan.
«Barlyq sýbektilerge 1 jylǵa deıin aldyn ala eskertý berildi. Atalǵan eskertýlerde kórsetilmegen talaptar oryndalmaǵan jaǵdaıda jer telimderi memleket ıeligine qaıtarylady»,-dedi Meıirhan Áshimhanov.
