ShQO-da 6 jasar bala kanalǵa batyp ketti
ÓSKEMEN. QazAqparat - Shyǵys Qazaqstanda demalýshylardyń sýǵa ketý oqıǵasy tyıylmaı tur. Ótken bir táýliktiń ishinde taǵy bir jasóspirim men kishkentaı bala tilsiz jaýdyń qurbanyna aınaldy, dep habarlaıdy QazAqparat tilshisi.
Oblystyq tótenshe jaǵdaılar departamentiniń málimdeýinshe, qaıǵyly oqıǵanyń biri Buqtyrma sý qoımasynyń jaǵasyndaǵy saıajaılardyń birinde bolǵan. Temirtaý qalasynyń 16 jastaǵy turǵyny, balalar úıiniń tárbıelenýshisi ekeni anyqtalǵan. Temirtaýlyq top atalmysh saıajaıdan sál alysta, demalys bazasyna toqtaǵan. Marqum óz tobynan bólinip shyǵyp, jalǵyz shomylyp júrgen. Onyń sýǵa batyp bara jatqanyn beıtanys adamdar kórip, qutqarýshylarǵa habar bergen.
«Jasóspirimniń denesi 40 mınýt ótken soń baryp 6 metr tereńdikten tabyldy. Ol ózgelerden bólinip, jabdyqtalmaǵan aýmaqta sýǵa túsken» - deıdi Shyǵys óńirlik aeroutqyr qutqarý jasaǵy №8 bólimshesiniń basshysy Marat Smaǵulov.
Ekinshi qaıǵyly oqıǵa Kúrshim aýdanynyń ortalyǵynda tirkeldi. Bir top bala eresekterdiń baqylaýynan tys egin sýaratyn kanaldyń boıynda sýǵa shomylyp júrgen. Olardyń qımylyn kópirden qyzyqtap otyrǵan 6 jastaǵy bala abaısyzda sýǵa qulaǵan. Ózinen bir jas úlken aǵasy ony ustap qalmaq bolǵanymen, shamasy jetpegen. Qaıǵyly oqıǵa týraly habar qutqarýshylarǵa tek 1 saǵattan keıin jetken.
«Kanaldyń tereńdigi keı jerinde 2 metrden asady. Balalar eresekterdiń baqylaýynsyz júrgenimen qoımaı, arnaıy keýdeshe men úrlengen quraldar kımegen» - deıdi №9 qutqarý jasaǵynyń basshysy Talǵat Nurjanov. Balanyń denesi búgin tańerteń qamys arasynan tabyldy.
