ShQO-da 6-synyp oqýshylary sýǵa batqan balany qutqaryp qaldy
ASTANA. QazAqparat - 10 sáýirde saǵat 21.30-da Úrjar AІІB-dan Úrjar aýyly, Seıfýllın kóshesinde turatyn 2009 jyly týǵan Aqıqat Aqjoldyń sol kúni saǵat 17.30-da úıden shyǵyp, qaıta oralmaǵany týraly habar kelip tústi.
Dabyl boıynsha Úrjar aýdanynyń AІІB men TJB qyzmekerleriniń jedel toby jınaldy. Saǵat 21.50-da Abaı atyndaǵy orta mekteptiń 6 «b» oqýshylary Súleımenov Ardaq pen Kelgenbaev Erdáýlet Aqıqat Aqjoldy úıine alyp kelgen.
Oqýshylardyń aıtýynsha, olar Shoshqaly ózeninde balyq aýlap júrgen, kenetten ózendegi sýǵa batyp kómek suraǵan balanyń daýysyn estıdi. Balalar dereý sýǵa batqan balany qutqarýǵa kiristi. Aqıqatty qutqarǵannan keıin jaǵaǵa alyp shyǵyp, úıine apardy.
Osyndaı áreketi úshin Abaı atyndaǵy orta mektepte jınalys ótkizildi. Súleımenov Ardaq pen Kelgenbaev Erdáýlet Úrjar aýdanynyń AІІB jáne TJB atynan syılyqpen marapattaldy. Sondaı-aq oqýshylardyń ata-analaryna da alǵys hattar tabystaldy.
