ShQO-da 56 mekteptiń oqýshylary pornografııalyq saıttarǵa emin-erkin kirip júrgen

ÓSKEMEN. KAZINFORM – Shyǵys Qazaqstan oblysyndaǵy 56 mektep oqýshylary pornografııalyq jáne býkmekerlik saıttarǵa bilim ordasynyń ınterneti arqyly emin-erkin kirip júrgen.

Óńir prokýrorlary júrgizgen tekserý nátıjesinde 56 mekteptegi 15 myńnan astam oqýshyǵa tyıym salynǵan ınternet-kontenttiń qoljetimdi bolǵandyǵy anyqtaldy. 

Naqty aıtqanda, Óskemenniń 7 mektebinde sabaq barysynda pornografııalyq sıpattaǵy sıýjetter izdestirilip, qaralǵan.

Al Shemonaıha aýdanyndaǵy 8 mektepte balalar býkmekerlik keńselerdiń saıttaryna kirgen.

Balalardyń ınternetke qoljetimdiligin shekteıtin baǵdarlamalyq qamtamasyz etýdiń joqtyǵy saldarynan osyndaı faktiler Rıdder qalasynda (15 mektep), Altaı (6 mektep) Samar (19 mektep) jáne Ulan aýdandarynda (1 mektep) tirkeldi. 

«Zańbuzýshylyqtar boıynsha oblys prokýratýrasy barlyq mektepke tıisti baǵdarlamalyq qamtamasyz etýdi ornatý jáne kináli tulǵalardy ákimshilik jaýapkershilikke tartý jóninde sharalar qabyldaý máselesin kóterdi. Qadaǵalaý aktisi oblystyń bilim berý salasynda sapany qamtamasyz etý departamentine jiberildi», - dep habarlady ShQO prokýratýrasynyń baspasóz qyzmetinen.