ShQO-da 500 oryndyq emhana salynady
ÓSKEMEN. QazAqparat - Shyǵys Qazaqstannyń Rıdder qalasynda bir aýysymda 500 adamǵa qyzmet kórsetetin emhana salynatyn boldy, dep habarlaıdy QazAqparat tilshisi.
Kendi Altaıdaǵy shahardyń qalalyq aýrýhanasyna qaraıtyn 12 ǵımarattyń birnesheýiniń turǵyzylǵanyna jarty ǵasyrdan asyp ketken. Oblystyq densaýlyq saqtaý basqarmasynyń basshysy Marat Shoranov aımaq basshysy Danıal Ahmetovke osyndaı problemany jetkizdi. Onyń aıtýynsha, aýrýhana keshenindegi eń eski ǵımarat 1939 jyly, taǵy bireýi 1941 jyly qoldanysqa berilgen eken. Aýrýhana degen aty bolǵandyqtan, keteýi ketken ǵımarattardy jyl saıyn jóndeýdiń ózi mashaqatty sharýaǵa aınalyp otyr. Jóndeýge shyǵyn shyqqanymen, nátıjesi shamaly.
«Jyl saıyn jóndeýge dep qarajat bólemiz. Onyń ózi bolmashy ǵana. Bulardy jermen-jeksen etip buzaıyq dep otyrǵan biz joq. Jaramdy degenderin jataqhana nemese ákimshilik ǵımarat qylyp paıdalanýǵa bolady. Ornyna kúnine 500 adamǵa qyzmet kórsetetin jańa emhana salsaq» - dedi Marat Shoranov.
Qazirgi emhanadan bir aýysymda 385 adam em qabyldaýy tıis. O bastaǵy jobalyq qýaty sondaı. Biraq kún saıyn densaýlyǵyna shaǵym aıtyp kelýshilerdiń sany 670-680 adamǵa jetip otyr. Basqarma basshysy 500 adamdyq emhana mundaı qajettilikti emin-erkin oryndaıtynyn aıtty.
«Bul - shynymen de sheshilýi tıis ózekti másele. Oblys boıynsha eski aýrýhana Borodýlıha aýdany men sizderde ǵana bar. Kóktemge deıin qurylystyń jobalyq-smetalyq qujatyna qajet 125 mln teńgeni bólemiz. Aldaǵy jyldary mynaý qaýsaǵan aýrýhananyń ornyna jańa ǵımarat beremiz» - dedi oblys ákimi.
