ShQO-da 500-den astam muǵalim robototehnıka men IT-tehnologııalardy meńgeredi

ÓSKEMEN. QazAqparat - Semeıde elektrotehnıkalyq kolledj negizinde orta mektep ustazdary zamanaýı robototehnıka kabınetterinde jumys jasaý boıynsha biliktilik arttyrý kýrstarynan ótýde, dep habarlaıdy QazAqparat tilshisi. 

Jazǵy demalys aıaqtalǵanǵa deıin oblysta 544 muǵalim oqýdan ótedi. Al jańa oqý jylynda Shyǵys Qazaqstan oblysynyń 277 mektebinde robototehnıka jáne IT-tehnologııalar kabınetteri ashylady.

Oblys ákiminiń orynbasary Ásem Núsipova IT-tehnologııalarǵa arnaıy baǵdarlama boıynsha oqytý máselesi alǵa qoıylǵan tusta iri kompanııalardan kóptegen usynystar túskenin aıtty. Semeıdegi Elektrotehnıkalyq kolledjdiń mamandary daıarlaǵan «Junior training» kýrsynyń avtorlyq baǵdarlamasy - usynylǵan nusqalardyń ishindegi eń úzdigi atanǵan. 

Semeı elektrotehnıkalyq kolledjiniń dırektory Azat Sarbekovtyń aıtýynsha, krýs ereksheligi - halyqaralyq tájirıbege negizdele otyryp, Shyǵys Qazaqstan mektepteriniń múmkindikterine qaraı oraılastyrylyp jasalǵany.



Kýrs 5 aptaǵa sozylady. Ondaǵy 3 apta usynylǵan baǵdarlamanyń teorııasyn oqýǵa, al qalǵan 2 apta ustazdardyń alǵan bilimderi men daǵdylaryn óz betterimen tájirıbe negizinde kórsetýine arnalady.

Kýrs baǵdarlamasy IT-baǵyt salalaryn túgeldeı qamtıdy. Oqý barysynda muǵalimder kórneki baǵdarlamalaý negizderin, 3D formatynda basyp shyǵarýǵa arnalǵan modeldeý negizderin úırenedi. Sondaı-aq, baǵdarlamaǵa web-dızaın negizderi, saıt jáne ǵalamtor resýrstaryn jasap úırený, kompıýterlik mehatronıka modýlderi jáne basqa da tehnıkalyq ınjenerlik pánder engizilgen. 

«Biz ár oqýshyny IT-tehnologııalar salasyndaǵy maman qylýdy maqsat tutpaımyz. Alaıda, zaman talaby sol bolǵandyqtan, Qazaqstannyń kez kelgen azamaty tsıfrlandyrý jáne IT-tehnologııa negizderin bilgeni jón. Balalar kishkentaı kezinen qarapaıym ómirde qajet bolatyn tehnologııalardy ıgeretin bolady. Budan bólek, bul sabaqtar oqýshylardyń analıtıkalyq oılaý qabiletin arttyryp, shetel tilderin ońaı meńgerýge yqpalyn tıgizedi. Alaıda, balalarǵa sapaly bilim berip, boılarynda qajet daǵdyny qalyptastyrý úshin, aldymen jalpy bilim beretin mektep ustazdaryn úıretip alý kerek», - dedi A. Núsipova. 

Oblystyń aqparat ortalyǵy habarlaǵandaı, atalmysh joba «Nur Otan» partııasynyń bastamasymen qolǵa alynǵan.