ShQO-da 500-den astam bala qazaq tilin úırený úshin aýylda bir aı turady

ÓSKEMEN. QazAqparat – Shyǵys Qazaqstan oblysynda balalarǵa qazaq tilin úıretý úshin «Qonaq otbasy» jobasy júzege asyrylmaq, dep habarlaıdy QazAqparat tilshisi.

ShQO ákimdiginiń málimetine súıensek, balalarǵa qazaq tilin úıretý úshin bıylǵy jazda eki pılottyq joba qolǵa alynbaq.

«Birinshisi - jazǵy lagerler, ekinshisi - Eýropa elderiniń úlgisi boıynsha «Qonaq otbasy» jobasy. Bul tájirıbelerdi zerttep, olardy bizdiń jaǵdaıǵa beıimdeýimiz kerek. 500-den astam bala 30 kún aýyldaǵy qazaq otbasylarynda qonaqta bolyp, aýyzeki qazaq tilin úırenetin bolady. Osy rette, Katonqaraǵaıdy basym aýdan retinde tańdap otyrmyz. Óıtkeni munda oqytý úshin ǵana emes, nátıjeli jáne paıdaly demalys pen saýyqtyrý úshin de barlyq múmkindik bar», - deıdi oblys ákimi Danıal Ahmetov.

Dál osy jerde balalar týǵan ólkeniń tarıhy men dástúrleri týraly bile alady. Endi bilim basqarmasy men aýdan ákimdigi qolaıly otbasylardy izdeý boıynsha jumys júrgizýi tıis.

«Munda sanıtarlyq jaǵdaıdan bastap úıdegi psıhologııalyq ahýalǵa deıin barlyǵyn eskerý qajet. Balany qabyldaıtyn árbir otbasy 181 myń teńge alady. Sondaı-aq tildi úıretý ǵana emes, ekskýrsııalardy, dástúrli oıyndardy qamtıtyn baǵdarlama ázirleý kerek», - deıdi aımaq basshysy.