ShQO-da 50-den astam jas qyzmetker polıtsııa sapyna qosyldy
ASTANA. KAZINFORM — Respýblıka alańynda garnızondyq saptyq jıyn ótip, polıtsııa departamentiniń 50-den astam jas qyzmetkeri ant qabyldady, dep habarlaıdy Polisia.kz.
Saltanatty jaǵdaıda jas polıtseıler ant oqyp, qyzmetke resmı túrde kiristi. Olardy qoldaýǵa ata-analary, týǵan-týystary men dostary kelip, mańyzdy kúndi birge bólisti.
Jas qyzmetkerlerge arnaǵan sózinde polıtsııa departamentiniń bastyǵy Erlan Omarbekov bul sát qyzmettiń bastalýymen qatar, atqaratyn jumysy, qabyldaıtyn sheshimderi men jasaǵan áreketteri úshin jaýapkershilikti sezinýdi bildiretinin atap ótti.
— Ofıtserlik pogon — jáı ǵana mártebe emes. Onyń artynda kúrdeli jaǵdaılarda áreket etýge kún saıyn daıyn bolý, sheshim qabyldaı bilý jáne onyń saldary úshin jaýapkershilik ala bilý tur, — dedi oblystyń bas polıtseıi.
Jas qyzmetkerlerge ShQO ishki ister organdary men Ulttyq ulan ardagerleri keńesiniń tóraǵasy Nurlybek Úderbaev ta aq tilegin bildirdi. Ol jastarǵa kásibı jolda abyroımen qyzmet etip, qyzmettik boryshqa adaldyq pen azamattarǵa degen qurmetti saqtaýdy tiledi.
Saltanatty rásimnen keıin jeke quram qoǵamdyq tártipti qorǵaý boıynsha qyzmet atqarýǵa kiristi. Narıadtardyń aldyna negizgi mindetter qoıyldy. Olar — jumysty úılesimdi uıymdastyrý, tártipti saqtaý, mindetterdi oryndaýǵa únemi daıyn bolý jáne qyzmette ustanymdylyq tanytý.
Buǵan deıin Memlekettik kúzet qyzmetinde kóktemde shaqyrylǵan sarbazdar ant qabyldaǵanyn jazǵanbyz.
