ShQO-da 5 jyldan beri apattyq jaǵdaıda turǵan Úıdene sý qoımasy qaıta jańartyla ma
ShQO Aqparat ortalyǵynyń málimetinshe, búgin Ulttyq ekonomıka mınıstri Álibek Qýantyrov Zaısan aýdanyndaǵy Úıdene sý qoımasyna baryp, ondaǵy ahýalmen tanysty. Bul gıdroqurylys 1966 jyly salynǵan. Sodan beri ol jerdi sýarý úshin paıdalanylady. Sý qoımasynda 75 mln tekshe metr sý jınalady jáne 4 magıstraldy kanal bar.
«Qazsýshar» RMK Shyǵys Qazaqstan fılıalynyń dırektory Nurjan Ámirjanovtyń aıtýynsha, nysan 2018 jyldan beri apattyq jaǵdaıda tur. Óıtkeni 2016 jyly bastalǵan qaıta jańartý jumystary tekserý kezinde anyqtalǵan jobalyq sáıkessizdikterge baılanysty toqtatylǵan.
Jobalyq-smetalyq qujattamany túzetý boıynsha ótinim Qarjy mınıstrliginiń qaraýynda. Jobanyń shekti quny – 2,3 mlrd teńge. Respýblıkalyq bıýdjetten 1,9 mlrd teńge qajet.
«Úıdene sý qoımasynyń Zaısan aýdany úshin strategııalyq mańyzy bar. Sondyqtan másele Qarjy mınıstrligimen birlesip qaralady. Meniń oıymsha, bul nysan memleket menshiginde qalýy kerek», - dedi Álibek Qýantyrov.