ShQO-da 5 jyl boıy óz nysandaryna kirme jol bolmaǵan kásipkerlerdiń máselesi sheshildi
Sybaılas jemqorlyqqa qarsy is-qımyl agenttigi ShQO boıynsha departamentiniń málimetine súıensek, bir top kásipker óz nysandaryna kirme jol uıymdastyrýǵa járdem kórsetý týraly ótinish joldaǵan. Anyqtalǵandaı, olardyń bul máselesiniń sheshilmeı kele jatqanyna 5 jyl bolǵan.
2019 jyldan bastap kásipkerler ýákiletti organdarǵa ózderiniń kommertsııalyq nysandaryna kirme jol uıymdastyryp berý týraly birneshe ret júgingen. Alaıda olarǵa esh kómek kórsetilmedi.
«ShQO Sybaılas jemqorlyqqa qarsy qyzmeti «Atameken» óńirlik kásipkerler palatasymen birlesip, ýákiletti organdar men múddeli tulǵalardyń qatysýymen otyrys uıymdastyrdy. Nátıjesinde kásipkerlerdiń kommertsııalyq obektilerge kirme joldardy qamtamasyz etý jónindegi talaptaryn qanaǵattandyrý týraly sheshim qabyldandy», - delingen aqparatta.
Eske salsaq, buǵan deıin ShQO-da ákimdik qyzmetkeri grant almaq bolǵan kásipkerlerge zańsyz talap qoıǵany habarlanǵan.
foto - Sybaılas jemqorlyqqa qarsy is-qımyl agenttigi ShQO boıynsha departamentinen
