ShQO-da 5 myńǵa jýyq adamnyń bankrottyqqa bergen ótinishine bas tartyldy

ÓSKEMEN. KAZINFORM – Shyǵys Qazaqstan oblysynda eki jylda 742 adam bankrot dep tanylǵan. 

«QR azamattarynyń tólem qabilettiligin qalpyna keltirý jáne bankrottyǵy týraly» zań 2023 jylǵy 3 naýryzdan bastap kúshine engeli beri osy ýaqytqa deıin Shyǵys Qazaqstanda sottan tys bankrottyq rásimin qoldaný úshin 6 491 ótinish túsken.

— Onyń ishinde 4 671 ótinish boıynsha bas tartylyp, 1 078 ótinish qaralyp jatyr. Búginde 742 adam bankrot dep tanyldy. Olardyń ekinshi deńgeıli bankterge, mıkroqarjy uıymdaryna jáne kollektorlyq agenttikterge 2 mlrd 123 mln 572 686 teńge kólemindegi bereshekteri esepten shyǵaryldy, — dep habarlady ShQO Memlekettik kirister departamentiniń baspasóz qyzmetinen.

Sot arqyly bankrottyq rásimin azamattar eger bankterge, mıkroqarjy uıymdaryna jáne kollektorlyq agenttikterge bereshegi 1600 AEK-ten asatyn bolsa nemese múlikteri bolǵan jaǵdaıda, qaryz somasyna qaramastan qoldana alady. Bul múmkindikti qoldanýǵa oblys turǵyndarynan 126 ótinish tústi.

— Onyń ishinde 56 ótinishke bas tartylyp, 50-i qabyldandy, 20-sy sotta qaralyp jatyr. Qabyldanǵan 50 ótinishtiń ishinde 6 is apellıatsııa satysynda toqtatyldy, 15-i áli de rásimde. Al 29 is aıaqtalyp, jalpy somasy 6 mlrd 361 mln 852 888 teńge boryshtary bar azamattar bankrot dep tanyldy, — delingen aqparatta.

Eske salsaq, osyǵan deıin Almatyda bankrot atanǵan azamattardyń sany 4 myńnan asqany habarlanǵan.