ShQO-da 5 kolledj jataqhanasynyń qurylysy bastalady

ÓSKEMEN. QazAqparat – Shyǵys Qazaqstan oblysynda bıyl 5 kolledj jataqhanasynyń qurylysy bastalmaq, dep habarlaıdy QazAqparat tilshisi.

Ótken jyly Semeı qalasyndaǵy medıtsınalyq jáne elektrotehnıkalyq kolledj stýdentterine arnalǵan 700 oryndyq 2 jataqhana boı kótergen bolatyn. Osy jyly taǵy 5 jataqhananyń qurylysyn bastaý josparlanyp otyr. Onyń ekeýi memlekettik-jekeshelik seriktestik aıasynda salynbaq. Bes jobanyń biri – Óskemen qurylys kolledjiniń toǵyzqabatty 244 oryndyq jataqhanasy.

«Kolledjimizde jylyna 400-ge jýyq stýdent oqıdy. Olardyń 30 paıyzǵa jýyǵy basqa jaqtan kelgender. Sondyqtan jataqhananyń ashylýy stýdentterdiń baspana máselesin sheship, bilimge qoljetimdilikti arttyrady. Qurylys jumystary kelesi jyly aıaqtalady dep kútilýde. Munda tek bizdiń ǵana emes, basqa da kolledj stýdentteri turatyn bolady», - deıdi Óskemen qurylys kolledjiniń dırektory Nıkolaı Tokarev.

Sondaı-aq, toǵyzqabatty 244 oryndyq jataqhana Óskemen kópsalaly tehnologııalyq kolledji úshin de salynady. Al Óskemen medıtsınalyq kolledjiniń stýdentterine arnalǵan 428 oryndyq eki jataqhana boı kótermek. Aıagóz polıtehnıkalyq kolledjiniń stýdentterine besqabatty 104 oryndyq jataqhana jobasy ázirlengen. Semeı bıznes jáne servıs kolledji úshin 288 oryndyq bes jáne jetiqabatty jataqhanalar salynbaq.

Aıta keteıik, búginde Shyǵys Qazaqstanda kolledj stýdentterine arnalǵan 31 jataqhana bar. Onda 3,5 myńnan astam stýdent turady.