ShQO-da 48 myń oqýshyǵa mektep formasy tegin beriledi
ÓSKEMEN. QazAqparat – Shyǵys Qazaqstan oblysynda az qamtylǵan jáne kópbalaly otbasylardan shyqqan oqýshylar mektep formasymen tolyqtaı qamtamasyz etiledi, dep habarlaıdy QazAqparat tilshisi.
ShQO ákimi Danıal Ahmetovtyń aıtýynsha, muqtaj otbasylardaǵy árbir bala nazardan tys qalmaıdy.
«20 tamyzǵa deıin 48 myń oqýshy mektep formasymen tegin qamtamasyz etiledi. Sondaı-aq osy kategorııadaǵy balalarǵa aıaq kıim berilmek. Bıylǵy oqý jylynan bastap az qamtylǵan jáne kópbalaly januıalardan shyqqan 3 764 búldirshin balabaqshaǵa esh aqysyz barady», - dedi ol áleýmettik jelidegi tikeleı efır barysynda.
Budan bólek, 21 524 oqýshy qoǵamdyq kólikterde tegin júretin bolady. 1,6 myń balaǵa naryqtaǵy suranysqa ıe tehnıkalyq mamandyqtar boıynsha tegin bilim alýǵa múmkindik jasalyp otyr. Sonymen qatar osy sanattaǵy balalar joǵary oqý oryndarynda oblys ákiminiń granty aıasynda bilim almaq.
Esterińizge sala ketsek, osyǵan deıin ShQO mektepteriniń 58% oqý jylyn onlaın bastaıtyndyǵy habarlandy.
Sondaı-aq óńirde qashyqtan oqytý maqsatynda qosymsha 36 myń kompıýter satyp alynbaq.
