ShQO-da 45 gektarǵa jaıylǵan dala órti aýyzdyqtaldy
ÓSKEMEN. QazAqparat – Shyǵys Qazaqstan oblysy Zaısan aýdanynda 45 gektarǵa jaıylǵan dala órti aýyzdyqtaldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 3 qyrkúıekte Zaısan aýdany Aınabulaq aýyldyq okrýgi aýmaǵynda órt shyqqany jaıly habar tústi. Tilsiz jaý ashyq alańda shóp pen butany sharpydy.
«Qyzyl jalyndy óshirýge departamenttiń jeke quramynan 16 adam, 4 tehnıka, ormanshylardan 30 adam, 6 tehnıka jáne jergilikti atqarýshy organnan 30 adam, 6 tehnıka jumyldyrylǵan. Kúrdeli relef jáne qatty jel órtti sóndirýdi qıyndata tústi», - delingen aqparatta.
Órtpen kúreske tartylǵandardyń úılesimdi is-qımyldarynyń arqasynda ot eldi mekenderge taralmady. Jalpy aýdany 45 gektarǵa jaıylǵan tilsiz jaý 4 qyrkúıekte saǵat 17.25-te tolyqtaı aýyzdyqtaldy.
