ShQO-da 42 ruqsat etilmegen qoqys orny anyqtaldy
ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri 42 ruqsat etilmegen qoqys ornyn anyqtady, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 30 qyrkúıekten bastap qazan aıynyń sońyna deıin tártip saqshylary belgilenbegen jerlerde qoqys pen qurylys qaldyqtaryn tastaý faktilerin anyqtaý jáne jolyn kesý boıynsha aılyq júrgizýde. Sonyń aıasynda jergilikti atqarýshy organ ókilderi, ekobelsendiler, ekologııalyq jáne qoǵamdyq uıymdar múshelerinen mobıldi toptar qurylǵan.
«10 kún ishinde óńir aýmaǵynda 42 ruqsat etilmegen qoqys orny anyqtaldy. Solar boıynsha jergilikti atqarýshy organdarǵa eskertýler berildi. Nátıjesinde, búginde 8 qoqys orny joıylǵan», - dep habarlady vedomstvo ókilderi.
Sondaı-aq polıtseıler qoqys tastaǵany, saıabaqtardy, skverlerdi lastaǵany úshin ÁQBtK-niń 434-babyna sáıkes 54 adamdy ákimshilik jaýapqa tartty. 128 azamatqa abattandyrý erejelerin buzǵany úshin jalpy somasy 298 993 teńge mólsherinde aıyppul salyndy.
