ShQO-da 42 gektarǵa jaıylǵan dala órtimen kúres úsh kún boıy jalǵasýda
ÓSKEMEN. QazAqparat – Shyǵys Qazaqstan oblysy Samar aýdanynda 42 gektarǵa jaıylǵan dala órtimen kúres úsh kún boıy jalǵasýda, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 5 tamyz kúni Samar aýdanynda shóp órtengen. Sarybel aýyldyq okrýgindegi Chıkeev ýchaskesine jaıylǵan qyzyl jalynnyń jalpy aýdany shamamen 42 gektarǵa jetti.
«Órtti sóndirýge jergilikti atqarýshy organdardyń, TJD órt sóndirý bólimsheleriniń, Krasnogor jáne Qaıyndy ormanshylyqtarynyń, Sarybel tirek pýnktiniń kúshteri men quraldary jumyldyryldy. 7 tamyzda kómekke Óskemennen órt sóndirýshiler keldi. Tilsiz jaýmen kúres áli de jalǵasýda», - delingen aqparatta.
Qazirgi ýaqytta barlyǵy 120-dan astam adam men 12 tehnıka tartylǵan. Bul jartasty jerge jetý qıyn. Bul arnaıy tehnıkanyń jumysyn qıyndatýda. Orman qory men eldi mekenderge qaýip joq.
