ShQO-da 400-ge jýyq adam bir mezette Qyzyltas taýyna shyqty
ÓSKEMEN. KAZINFORM – Shyǵys Qazaqstan oblysy Ulan aýdanynda ár túkpirinen kelgen týrıster bıiktigi 900 metr bolatyn Qyzyltas taýyna bir mezette kóterildi.
Shyǵys Qazaqstandaǵy týrıstik maýsymnyń ashylýy Ulan aýdanynan bastaldy. Qazaqstannyń ár túkpirinen kelgen týrıster bıiktigi 900 metr bolatyn Qyzyltas taýyna kóterildi. Festıvalge barlyǵy 400-ge jýyq adam qatysty.
Jınalǵandarǵa taýǵa shyqqannan bólek, tarıhı ekskýrsııa, djıp-týr, atpen serýendeý, sadaq atý, jármeńke jáne áýe sharymen serýendeý uıymdastyryldy.
«Qatysýshylar sany budan da kóp bolar edi. Eldegi sý tasqyny jaǵdaıyna baılanysty ótetin merzimi shegerildi. Sodan bolar, basynda 700 adam keledi dep topshylaǵan sharaǵa kelýshiler sany 400-ge deıin kemidi. Degenmen osy syndy týrlar ótkizý arqyly Shyǵystyń týrızmin damytýǵa bolady. Osy jaqqa arnaıy kelgen keı adamdar tikushaqqa bılet alyp, Óskemendegi qonaqúılerde turaqtady. Óskemennen bólek, Astana, Almaty, Qaraǵandy, Pavlodar, Semeı qalalarynan keldi», – dedi sharany uıymdastyrýshylardyń biri, kásipker Muhtar Toıbazarov.
Qutqarýshylar aldyn ala ýchaskelerdi bólip, kópshilik júretin jerlerge belgi ornatqan. Jurt sol arqyly taýǵa shyqty. Búrkitshi Baqytbek Manaıuly qazaqy bolmysty kórsetip, qusyn Qasym Qaısenov kentinen arnaıy ákelgen. Týrıster ony aınalshyqtap, sýretke túsýge asyqty.
