ShQO-da 40-tan astam qoǵamdyq qutqarýshy oqytylýda
ÓSKEMEN. QazAqparat – Shyǵys Qazaqstan oblysynda 42 qoǵamdyq qutqarýshy oqytylyp jatyr, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, jedel-qutqarý jasaǵynyń qyzmetkerleri 35 qoǵamdyq qutqarýshyny oqytty. Qazirgi ýaqytta taǵy 42 adam bilim alýda.
«Jattyǵý sý jaǵalaýlaryndaǵy qutqarý beketterinde ótkizilýde. Kýrstar sýǵa batyp bara jatqan adamǵa kómektesý daǵdylaryna úıretý, qutqarý quraldaryn paıdalaný jáne alǵashqy medıtsınalyq kómek kórsetý erejelerin oqytýǵa negizdelgen», - delingen habarlamada.
Sondaı-aq qutqarýshylar balalardyń qaýipsizdigine erekshe nazar aýdarýda. Osy oraıda oqýshylarǵa túsindirý jumystary júrgizilip jatyr.
«Dál osyndaı sabaqtarda alynǵan bilim men daǵdylar tótenshe jaǵdaıda balalarǵa kómektesedi. Bul baǵyttaǵy jumystar jaz boıy jalǵasyn tappaq», - dedi ShQO TJD bastyǵynyń orynbasary Dmıtrıı Tıtov.
Aıta keteıik, óńir boıynsha bıylǵy shomylý maýsymy bastalǵanǵa deıin kámelettik jasqa tolmaǵan 2 bala sýǵa batyp ketken.
