ShQO-da 40 myń teńge para alǵan polıtseı túrmege qamaldy

ÓSKEMEN. KAZINFORM – Shyǵys Qazaqstan oblysy Glýbokoe aýdanynda para alǵan polıtseı men oǵan aqsha bergen júrgizýshi sottaldy.

Patrýldik polıtsııa batalonynyń ınspektory áriptesimen birge Óskemen-Shemonaıha tasjolynda qyzmettik kóligimen kezekshilikte júrgen. Olar Glýbokoe kentine burylatyn tusta jeńil kóliktiń «Gazeldi» basyp ozý úshin qarsy jolaqqa shyǵyp ketkenin baıqady.

Sot barysynda anyqtalǵandaı, ınspektor K. kólikti toqtatyp, júrgizýshini qyzmettik kólikke shaqyrǵan. Sodan soń júrgizýshige QR ÁQBtK-niń 596-baby 3-bóligi (qarsy qozǵalys jolaǵyna shyǵý) boıynsha hattama toltyrylatyny týraly eskertken.

- Alaıda er adam júrgizýshi kýáliginen aıyrylǵysy kelmegendikten hattama toltyrmaýdy ótingen. Osy úshin ınspektor odan 40 myń teńge suraǵan. Júrgizýshi bul somany ózi aýdara almaǵan soń, tanysyna habarlasyp, jaǵdaıdy túsindirip, polıtseıdiń banktegi shotyna aqsha aýdaryp berýin ótingen, - dep habarlady Glýbokoe aýdandyq sottyń baspasóz qyzmetinen.

Osylaısha úsh adam sottaldy: polıtseı — para alǵany úshin, júrgizýshi — para bergeni úshin, al onyń tanysy — para berýge kómekteskeni úshin.

- Sot sheshimimen polıtsııa qyzmetkeri 1 jylǵa túrmege qamaldy. Al kólik júrgizýshisi men onyń tanysy 7 aı merzimge bas bostandyqtarynan aıyryldy, - delingen aqparatta. 

Sottalýshylar bul sheshimmen kelispeı apellıatsııalyq shaǵym túsirdi. Nátıjesinde oblystyq sot júrgizýshi men onyń tanysyna taǵaıyndalǵan jaza túrin bas bostandyǵynan aıyrýdan - bas bostandyǵyn shekteýge aýystyrdy.

Eske salsaq, osyǵan deıin Rıdder turǵyny temeki tuqylyn tastaǵany úshin salynǵan aıyppulmen kelispeı, polıtseılerdi sotqa bergeni habarlanǵan.