ShQO-da 4 kólik soqtyǵysyp, 2 adam zardap shekti
ÓSKEMEN. QazAqparat – Shyǵys Qazaqstan oblysynda 4 kólik soqtyǵysyp, 2 adam zardap shekti, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jol apaty 13 naýryzda saǵat 11.00-ler shamasynda «Óskemen-Altaı-Katonqaraǵaı-Rahman qaınarlary» tasjolynda bolǵan.
«Vasılevka men Sajaevka aýyldarynyń arasynda kele jatqan 3 «Lada» men 1 «Ravon Nexia» markaly avtokólikter soqtyǵysty. Sondaı-aq «Lada 21214» kóligin tizgindep Óskemenge qaraı kele jatqan 56 jastaǵy júrgizýshi rýldi basqara almaı qalyp, atalǵan 4 kóliktiń qasynda turǵan 2 adamdy qaǵyp ketken. Zardap shekkender medıtsınalyq mekemege jetkizildi», - delingen habarlamada.
Qazirgi ýaqytta atalǵan fakti boıynsha QR Qylmystyq Kodeksiniń 345-baby 2-bóligine sáıkes sotqa deıingi tergeý amaldary júrgizilýde.
