ShQO-da 4 alaıaq ózderin rıeltor retinde tanystyryp, 60 mln teńge paıda kórgen
ÓSKEMEN. KAZINFORM – Shyǵys Qazaqstan oblysynda 4 alaıaq ózderin rıeltor retinde tanystyryp, halyqty 60 mln teńge shyǵynǵa batyrǵan.
ShQO Polıtsııa departamenti uıymdasqan qylmysqa qarsy kúres basqarmasynyń qyzmetkerleri alaıaqtar tobyn quryqtady.
«Anyqtalǵandaı, olar ózderin rıeltor jáne notarıýs retinde tanystyryp, ishimdikke beıim shyǵysqazaqstandyqtardyń birneshe páterin óz attaryna aýdaryp alǵan. Kúdiktilerdiń páterlerin tintý barysynda jedel ýákilder ártúrli jyljymaıtyn múlik obektilerine qujattar, jeke tulǵalardyń derbes derekterin jáne is boıynsha ózge de zattaı dáleldemeler tárkiledi», - delingen oblystyq PD baspasóz qyzmeti taratqan aqparatta.
Jábirlenýshilerge keltirilgen jalpy shyǵyn mólsheri 60 mln teńgeden asady.
«Polıtsııaǵa tórt kúdikti jetkizildi. Olardyń osyǵan uqsas qylmystarǵa qatysy bar-joǵy anyqtalýda. Tergeý asa iri mólsherdegi alaıaqtyq faktisi boıynsha júrgizilip jatyr», - delingen habarlamada.
Eske salsaq, osyǵan deıin Óskemende jalǵan hattamalar toltyryp kelgen polıtseı sottalǵany habarlanǵan.
