ShQO-da 37 mıgrant el aýmaǵynan shyǵaryldy
ÓSKEMEN. QazAqparat – Shyǵys Qazaqstan oblysynda 37 mıgrant el aýmaǵynan shyǵaryldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, óńir polıtseıleri «Mıgrant» jedel aldyn alý sharasyn júrgizýde.
Alǵashqy jeti kún ishinde halyqtyń kóshi-qony týraly zańnamasyn buzǵan 865 sheteldik ákimshilik jaýapkershilikke tartylǵan.
Onyń ishinde 37 shetel azamaty Qazaqstan Respýblıkasynyń aýmaǵynan shyǵaryldy.
«293 el azamaty óz úılerinde kóship kelýshilerdiń bolýy týraly ishki ister organdaryna ýaqtyly habardar etpegeni úshin jaýapqa tartyldy. Sheteldikterdi ýákiletti organnyń ruqsatynsyz jumysqa tartqan 40 kásipker aıyppul arqalady. Sondaı-aq jedel aldyn alý sharasy aıasynda qos azamattyǵy bar 3 adam tirkeldi», - delingen habarlamada.
Máselen, 12 maýsymda Ulan aýdanynda turǵyn úı qurylysynda ruqsatsyz jumys istep júrgen Ózbekstan Respýblıkasynyń 4 azamaty anyqtaldy.
Jumys berýshige QR ÁQBtK 519-babyna sáıkes 30 AEK aıyppul salynsa, sheteldikter QR ÁQBtK 517-baby 5 bóligi boıynsha 3 kúnge ákimshilik qamaqqa alyndy.
