ShQO-da 37 kásipkerdiń quqyǵy qorǵaldy
ASTANA. KAZINFORM – Shyǵys Qazaqstan oblysynda prokýratýranyń aralasýynan keıin 37 kásipkerdiń quqyǵy qorǵalyp, olarǵa 106,47 mln teńge kólemindegi bereshek tolyq óteldi.
Altaı aýdanynyń prokýratýrasy bıznes sýbektileriniń quqyqtaryn qorǵaý salasyna júrgizgen taldaý barysynda «Altaı aýdanynyń aýdanaralyq aýrýhanasy» ShJQ-daǵy MKK memlekettik satyp alý týraly zańnama talaptaryn buzǵanyn anyqtady.
Prokýratýranyń málimetinshe, medıtsınalyq mekeme jetkizýshiler aldynda buryn jetkizilgen taýarlar, oryndalǵan jumystar men kórsetilgen qyzmetter úshin merzimi ótken bereshektiń qalyptasýyna jol bergen.
– Prokýrorlyq qadaǵalaý aktisi negizinde aýdanaralyq aýrýhana 37 kásipkerlik sýbektisi aldyndaǵy jalpy somasy 106,47 mln teńgeni quraıtyn merzimi ótken bereshekti tolyq kólemde ótedi, – delingen prokýratýra habarlamasynda.
Vedomstvonyń atap ótýinshe, qabyldanǵan sharalar memlekettik kásiporynnyń bıznes aldyndaǵy mindettemelerin ýaqytyly oryndaýyn qamtamasyz etýge múmkindik bergen.
Prokýratýra kásipkerlerdiń quqyqtaryn qorǵaý, memlekettik satyp alý salasyndaǵy zańdylyqty saqtaý jáne qolaıly bıznes-ahýaldy qalyptastyrý óz qyzmetiniń basym baǵyttarynyń biri bolyp qala beretinin málimdedi.
Aıta keteıik, Túrkistan oblysynda kásipkerler 200 mlrd teńgeni shetelge zańsyz shyǵarǵany anyqtaldy.
