ShQO-da 365 adam qyzylshaǵa qarsy vaktsına alǵany jaıly jalǵan qujat jasatqan

ÓSKEMEN. KAZINFORM – Shyǵys Qazaqstan oblysynda 365 adamnyń qyzylshaǵa qarsy vaktsına alǵany jaıly jalǵan qujat jasatqany anyqtaldy.

Ótken jyldyń basynan beri elde qyzylsha aýrýy órship ketti. ShQO Prokýratýrasy sol kezde óńirde jalǵan vaktsınatsııa faktileri tirkelgenin anyqtady.

«QR Bas sanıtarlyq dárigeriniń qaýlysymen qyzylsha boıynsha jaǵdaıdy jaqsartý úshin birqatar sanıtarlyq-epıdemıologııalyq jáne sanıtarlyq-profılaktıkalyq shara qabyldandy. Sonyń ishindegi ınfektsııanyń aldyn alýdyń tıimdi ádisi – vaktsına egý. Alaıda tekserý barysynda oblys boıynsha halyqqa jalǵan ekpe egýdiń 365 faktisi, ekpe alýdan medıtsınalyq kórsetilimmen negizsiz bas tartýdyń 55 faktisi anyqtaldy», - dep habarlady prokýratýranyń baspasóz qyzmetinen.

Sonymen qatar medıtsınalyq mekemeler sanıtarlyq-epıdemıologııalyq talaptardy 11 ret buzǵan.

«Qadaǵalaý aktisi boıynsha zańbuzýshylyqtardy joıý jáne laýazymdy tulǵalardy jaýapqa tartý boıynsha sharalar qabyldanýda. Qyzylsha aýrýynyń órshýine jol bermeý úshin azamattardy ekpe sharalaryna belsendi qatysýǵa shaqyramyz», - delingen aqparatta.