21:23, 13 Naýryz 2020 | GMT +5
ShQO-da 364 shaqyrym arnalar men aryqtar qardan tazartyldy
ÓSKEMEN. QazAqparat – Shyǵys Qazaqstan oblysynda sý tasqynynyń aldyn alý úshin 364 shaqyrym arnalar men aryqtar qardan tazartylǵan, dep habarlaıdy QazAqparat.
Bul jaıly búgin ShQO óńirlik kommýnıkatsııalar qyzmetine ótken baspasóz konferentsııasynda oblystyq jumyldyrý daıyndyǵy basqarmasynyń basshysy Eldos Chıkenov málim etti.
«Qazirgi ýaqytta 1 mlnǵa jýyq tekshe mert qar shyǵarylǵan. Ózenderdegi muz jarý jumystaryna 150 mln teńge qarjy bólindi. 364 shaqyrym arnalar men aryqtar qardan tazartylǵan. Negizinen óńirdegi Glýbokoe, Borodýlıha, Shemonaıha jáne Altaı aýdandarynda sý basý qaýpi joǵary bolyp otyr», - deıdi ol.
Eldi mekenderdegi qar shyǵarý jumystaryna oblystyq bıýdjetten qosymsha 255 mln teńge bólingen. Sondaı-aq 100 myń dana ydys-qap, 4,9 tonna ınertti materıaldar daıyndalǵan.