ShQO-da 352 adam zańsyz mıtıngige qatysqany úshin eki aptaǵa qamalǵan

ÓSKEMEN. QazAqparat – Shyǵys Qazaqstan oblysynda qańtardaǵy jappaı tártipsizdikke qatysqan 350-den astam adam ákimshilik qamaýǵa alynǵan, dep habarlaıdy QazAqparat tilshisi.

Bul jaıly búgin onlaın formatta ótken baspasóz máslıhaty barysynda ShQO soty qylmystyq ister jónindegi sot alqasynyń tóraǵasy Qaırat Chakpantaev málim etti.

«Oblys boıynsha qańtar oqıǵasyna qatysty QR ÁQBtK-niń 488-babymen (ruqsat etilmegen mıtıngke qatysý) 500-den astam is qaralǵan. Nátıjesinde 352 adam 15 kúnge ákimshilik qamaýǵa alynyp, 77 adam aıyppul tóleýge mindetteldi», - dedi ol.

Qaırat Chakpantaevtyń aıtýynsha, ázirge qylmystyq ister sotqa jetpegen.

Polıtseıler áli de sotqa deıingi tergeý amaldaryn júrgizýde.

«Bul ister sáýir aıynda sotqa jetedi dep kútilýde. Jalpy óńirde azamattarǵa qatysty QR QK-niń 272-baby (Jappaı tártipsizdikter uıymdastyrý) jáne 269-baby (Ǵımarattarǵa, qurylystarǵa jáne baılanys quraldaryna shabýyl jasaý nemese olardy basyp alý) boıynsha 70 is qozǵalǵan», - dedi sot alqasynyń tóraǵasy.