ShQO-da 35 myńnan astam medıtsına qyzmetkeri ústemeaqy aldy
ÓSKEMEN. QazAqparat – Shyǵys Qazaqstan oblysynda bıyl koronavırýsqa qarsy kúreske jumyldyrylǵan 35 myńnan astam medıtsına qyzmetkeri ústemeaqy aldy, dep habarlaıdy QazAqparat tilshisi.
Bul týraly Áleýmettik-medıtsınalyq saqtandyrý qory ShQO boıynsha fılıalynyń dırektory Ǵalymjan Ábilov Aımaqtyq kommýnıkatsııalar qyzmetinde ótken baspasóz brıfıngi barysynda málim etti.
«Jyl basynan beri koronavırýsqa qarsy kúreske tartylǵan 35 437 medıtsına qyzmetkeri ústemeaqy aldy. Aq halattylarǵa 5,2 mlrd teńgeden astam ústemeaqy tólendi. Aıta ketý kerek, 1 qazannan bastap indetpen kúreske jumyldyrylǵan medıtsına qyzmetkerlerine ústemeaqy tóleýdi toqtatý týraly buıryq jobasy talqylaný barysynda», - dedi ol.
Onyń aıtýynsha, erekshe jáne zııandy eńbek jaǵdaılarynda medıtsınalyq kómek kórsetetin qyzmetkerlerdi qoldaýdyń júıeli sharalaryna kóshý maqsatynda ústemaqylar mólsherin kezeń-kezeńimen tómendetý usynylǵan.
«Tamyzdan qyrkúıekke deıin ústemaqy belgilengen mólsherden 50% berilse, 1 qazannan bastap tólenbeıdi. Bul rette, reanımatolog-anestezıologtar, ınfektsıonıster, reanımatologııa jáne anestezıologııa bólimsheleriniń anestezısteri, epıdemıologtar, psıhologtar jáne MSAK áleýmettik qyzmetkerleri, ıadrolyq medıtsına ortalyǵynyń mamandary men patologonatomdarǵa ústemeaqy tóleý jalǵasady», - dedi fılıal basshysy.
