ShQO-da 345 balaǵa jańajyldyq syılyqtar berildi
ÓSKEMEN. QazAqparat – Shyǵys Qazaqstan oblysynda Jańa jyl qarsańynda balalar úshin merekelik shara uıymdastyrylyp, Qazaqstan Respýblıkasynyń Prezıdenti men Shyǵys Qazaqstan oblysynyń ákimi atynan syılyqtar tartý etildi, -dep habarlaıdy QazAqparat tilshisi.
2020 jylǵy jańajyldyq shyrshalarǵa jetim, ata-anasynyń qamqorlyǵynsyz qalǵan, turmysy tómen jáne kópbalaly otbasylardan shyqqan jáne erekshe qajettiligi bar 9 jastan 13 jasqa deıingi balalar, sondaı-aq oqýda, sportta, shyǵarmashylyqta nemese qoǵamdyq ómirde jetistikke jetken daryndy búrdirshinder qatarynan 345 bala qatysty.
Óńirde qalyptasqan epıdemıologııalyq jaǵdaıǵa baılanysty bıyl jańajyldyq shyrshalar kezinde syılyqtar tabystaldy. Osy jyly merekelik sharanyń taqyryby «Ǵajaıypqa toly Jańa jyl!» dep atalǵan.
Balalardy Jańa jylmen QR Prezıdentiniń atynan oblys ákimi Danıal Ahmetov quttyqtady.
«Balalar, qalyptasqan epıdemıologııalyq jaǵdaıǵa qaramastan, sizder jyl boıy konkýrstarǵa, olımpıadalarǵa, jarystarǵa belsendi qatysyp júldeli oryndardy alǵandaryńyzǵa óte qýanyshtymyn. Qazirgi zamanda sizder joǵary bilimdi, básekege qabiletti bolýlaryńyz kerek. Laıyqty bilim alý úshin biz sizderge jaqsy jaǵdaı jasaýǵa tyrysamyz», – dedi Danıal Ahmetov óz quttyqtaýynda.
Aıta keteıik, shara barlyq sanıtarlyq normalardy saqtaı otyryp uıymdastyryldy.
