ShQO-da 33 eldi meken tasqyn zardabyn shegýde
ÓSKEMEN.QazAqparat - Shyǵys Qazaqstan oblysynyń 16 aýdany tasqyn saldarymen kúresýde, dep habarlaıdy QazAqparat tilshisi.
Sý basqan 33 eldi mekenniń ishinde Óskemen, Semeı, Aıagóz jáne Shemonaıha syndy qalalar da bar. Keshegi táýlik ishinde apat saldarymen kúreske Tótenshe jaǵdaılar komıtetiniń jeke quramynan 500 adam jumyldyryldy. Oblystyq tótenshe jaǵdaılar departamenti tasqyn saldaryn joıý jumystaryna 116 tehnıka, 54 sý soratyn qural, 7 qaıyq qoldanylǵanyn habarlady. Departamenttiń deregine súıensek, búginge deıin 897 úıden sý qaıtqan. Glýbokoe aýdanynda 22 úı, Shemonaıha aýdanynda 4 úı áli sý qursaýynda tur.
«Ótken táýlikte negizgi oqıǵalar Semeı qalasynda órbidi. Qala ákiminiń ókimimen shaharda tótenshe jaǵdaı jarııalanǵan bolatyn. Qazir munda 141 jer úıge, 596 saıajaı ǵımaratyna sý kirip, 220 adam qaýipsiz jerge kóshirildi. Turǵyndarǵa kelgen materıaldyq shyǵyndy esepteý úshin arnaıy komıssııa quryldy» - delingen resmı málimette. 
