ShQO-da 328 balanyń paıdasyna 80 mln teńge alıment óndirildi
ASTANA. KAZINFORM – Shyǵys Qazaqstan oblysynyń prokýratýrasy kámeletke tolmaǵan balalardyń quqyqtaryn qorǵaý jáne alıment óndirý týraly sot aktileriniń oryndalýyn qamtamasyz etý baǵytynda júıeli jumys júrgizip jatyr.
Vedomstvonyń málimetinshe, boryshkerlerge qatysty májbúrleý sıpatyndaǵy naqty sharalar qabyldanýda. Atap aıtqanda, olardyń Qazaqstannan tys jerlerge shyǵýyna shekteý qoıylyp, izdeý jarııalaý, sondaı-aq zańda kózdelgen jaýaptylyqqa tartý tetikteri iske asyrylýda.
- Aǵymdaǵy jyldyń basynan beri 29 boryshker ákimshilik jaýaptylyqqa, al 8 tulǵa qylmystyq jaýaptylyqqa tartylǵan.
Sonymen qatar, sot oryndaýshylarynyń qyzmetine tekserýler júrgizilýde. Qadaǵalaý barysynda úsh kámeletke tolmaǵan balanyń paıdasyna alıment óndirý týraly atqarýshylyq óndiristerdiń biri boıynsha zań buzýshylyqtar anyqtalǵan, - dep jazdy qadaǵalaýshy organnan.
Atap aıtqanda, sot oryndaýshysy bereshekti uzaq ýaqyt boıy esepke almaǵan, bul qaryz týraly málimetterdiń burmalanýyna ákelgen. Budan bólek, 2024 jyly óndirilgen 300 myń teńge kólemindegi qarajat óndirip alýshylarǵa ýaqytyly aýdarylmaı, tek prokýratýranyń aralasýynan keıin ǵana berilgen.
Atalǵan derek boıynsha oblys prokýratýrasy tártiptik is qozǵaý týraly qaýly qabyldady. Nátıjesinde sot oryndaýshysy Qazaqstan Respýblıkasy Jeke sot oryndaýshylarynyń respýblıkalyq palatasy músheliginen shyǵaryldy.
Qabyldanǵan sharalardyń nátıjesinde 328 balanyń paıdasyna alıment boıynsha 80 mln teńgeden astam bereshek óteldi.
Oblys prokýratýrasy ata-analardyń balalardy asyrap-baǵý mindeti zańmen bekitilgenin eske salady. Alıment tóleýden jaltarý ákimshilik jáne qylmystyq jaýaptylyqqa ákep soǵady.
Vedomstvo málimetinshe, balalardyń quqyqtaryn qorǵaý jumystary turaqty baqylaýda.
Aıta keteıik, Mańǵystaýda alıment tólemeı júrgen 100-den astam adam jaýapqa tartyldy.
