ShQO-da 300-den astam azamat qos azamattyqqa qatysty zań buzǵany úshin esepke alyndy
ASTANA. KAZINFORM — Jyl basynan beri ShQO-da 300-den astam azamattyqtan aıyrylý deregi tirkeldi. Bul týraly Polisia.kz jazdy.
Shyǵys Qazaqstan oblysy polıtsııa departamentiniń kóshi-qon qyzmeti azamattyq salasyndaǵy zańnama talaptarynyń saqtalýyn baqylaý jáne quqyq buzýshylyqtardyń aldyn alý baǵytynda júıeli jumystar júrgizip keledi.
— Jyl basynan beri óńirde Qazaqstan Respýblıkasy azamattyǵynan aıyrylýdyń 300-den astam deregi tirkelgen. Atalǵan jaǵdaılardyń basym bóligi azamattardyń kórshiles memlekettiń azamattyǵyn alýymen baılanysty bolǵan. ShQO PD kóshi-qon qyzmeti basqarmasynyń bastyǵy Rınat Shkıbaev atap ótkendeı, zań talaptaryn buzǵany úshin 18 adam ákimshilik jaýapkershilikke tartylǵan. Onyń ishinde 14 azamat shetel azamattyǵyn alǵany týraly ýákiletti organdarǵa belgilengen merzimde habarlamaǵan. Al taǵy 4 adam azamattyǵynan aıyrylǵanyna qaramastan Qazaqstan Respýblıkasy azamatynyń qujattaryn paıdalanýdy jalǵastyrǵan, — delingen habarlamada.
Máselen, kóshi-qon qyzmetiniń qyzmetkerleri naýryz aıynda basqa memlekettiń azamattyǵyn alǵan erli-zaıyptylardy anyqtady. Alaıda olar bul týraly memlekettik organdarǵa ýaqytyly habar bermegen. Quqyq buzýshylardan Qazaqstan Respýblıkasy azamattarynyń qujattary tárkilenip, azamattyqtan aıyrylý faktisi resmı túrde tirkeldi. Keıin olar el aýmaǵynan shyǵarylyp, qoldanystaǵy zańnamaǵa sáıkes Qazaqstan Respýblıkasyna bes jyl merzimge kirýge tyıym salyndy.
Shyǵys Qazaqstan oblysy polıtsııa departamentiniń kóshi-qon qyzmeti Qazaqstan Respýblıkasynyń Konstıtýtsııasyna sáıkes elimizde qos azamattyqqa jol berilmeıtinin eske salady. Polıtseıler azamattardy zań talaptaryn qatań saqtaýǵa jáne azamattyq ózgergen jaǵdaıda bul týraly memlekettik organdarǵa der kezinde habarlaýǵa shaqyrady.
Eske sala keteıik, buǵan deıin Pavlodarda qos azamattyqpen júrgen turǵyn elden shyǵarylǵan bolatyn.
