ShQO-da 300-den astam aǵash zańsyz kesilgen
ÓSKEMEN. QazAqparat – Shyǵys Qazaqstan oblysynda belgisiz bireýler 300-den astam aǵashty zańsyz kesken, dep habarlaıdy QazAqparat tilshisi.
ShQO orman sharýashylyǵy jáne janýarlar dúnıesi ınspektsııasynyń qyzmetkerleri zańsyz aǵash kesýdiń eki faktisin anyqtady. «Qazavtojol UK» AQ ıeligindegi ormannyń, naqty aıtqanda «Óskemen-Semeı» respýblıkalyq tasjolynyń Saratov aýylyna aparar 14-21-shi shaqyrymynda kesilgen aǵash butaqtary tabyldy.
«2019-2020 jyldarǵa osy jerlerdegi aǵashtardy kesýge ruqsat berilmegen. Tekserý nátıjesinde 336 aǵashtyń zańsyz kesilgeni belgili boldy. Onyń ishinde 232 terek, 79 qandyaǵash jáne 25 úıeńki aǵashy. Osynyń saldarynan tabıǵatqa 314 103 teńge kóleminde zalal keltirilgen», - delingen ınspektsııa málimetinde.
Ekinshi fakti Ulan aýdanynyń ákimshilik aýmaǵynda, naqty aıtqanda «Óskemen-Bozanbaı» tasjolynyń 23-shi shaqyrymyndaǵy Sibe ózeniniń sol jaǵalaýynda anyqtaldy. Munda 19 terek zańsyz kesilgen. Tabıǵatqa keltirilgen zalal mólsheri – 99 813 teńge.
