ShQO-da 30 jylda 8 mıllıon sharshy metrden astam turǵyn úı salyndy

SEMEI. QazAqparat – Shyǵys Qazaqstan oblysynda táýelsizdiktiń 30 jylynda segiz mıllıon sharshy metrden astam turǵyn úı salynǵan, dep habarlaıdy QazAqparat tilshisi.

Semeıde QR Táýelsizdiginiń 30 jyldyǵyna arnalǵan saltanatty shara ótti. Onda el damýyna úles qosqan qoǵam qaıratkerleri men qala belsendileri marapattaldy. Jınalǵandardy aıtýly datamen ShQO ákiminiń orynbasary Nurjan Jumadilov quttyqtady.

«Barshańyzdy el Táýelsizdiginiń 30 jyldyǵymen shyn júrekten quttyqtaımyn! Elbasy Nursultan Nazarbaevtyń basshylyǵymen qýatty Qazaqstannyń negizi qalanyp, halyqaralyq arenadaǵy bedeli artty. Táýelsizdik jyldary tarıhı mańyzy zor qurylymdyq, konstıtýtsııalyq saıası reformalar qabyldandy. Shyǵys Qazaqstan oblysynda ómirdiń barlyq salalarynda eleýli jetistikterge qol jetkizildi. Syrtqy saýda aınalymynyń kólemi 9 esege artyp, óńirdi damytýǵa 5,3 trln teńge ınvestıtsııa tartyldy. Egemendiktiń alǵashqy jyldaryndaǵy daǵdarystardan aman-esen ótken bizdiń iri kásiporyndarymyzdyń ónimi 30 jyl buryn 28 mln teńgeni qurasa, búgingi kúni jylyna 2 trln teńgege jetti», - dedi ol.

Nurjan Jumadilovtiń aıtýynsha, osy jyldar ishinde aýyl sharýashylyǵy ónimderi 9 esege ulǵaıdy. 8 mıllıon sharshy metrden astam turǵyn úı salynyp, 88 myńnan astam adam baspanaly boldy.

«Semeı jáne Óskemen qalalarynyń áýejaılary qaıta jańartýdan ótti. Úsh myń shaqyrymnan astam jol jóndelip, 41 kópir salyndy. Qazirgi ýaqytta Buqtyrma sý qoımasy arqyly ótetin kópirdiń qurylysy bastaldy. Osy jetistikterdiń barlyǵy - shyǵysqazaqstandyqtardyń kúndelikti eńbegi, memlekettik baǵdarlamalardy júzege asyrýlarynyń nátıjesi», - dedi óz sózinde oblys ákiminiń orynbasary.