ShQO-da 30 keli balyqty zańsyz tasymaldaǵan er adam jaýapqa tartyldy

ÓSKEMEN. QazAqparat – Shyǵys Qazaqstan oblysy Kókpekti aýdanynyń turǵyny 30 keli balyqty qujatsyz tasymaldaǵan, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, respýblıkalyq mańyzy bar «Almaty-Óskemen» tasjolyn patrýldep júrgen tártip saqshylary 914 shaqyrymda VAZ avtokóligin toqtatqan. Kólik tizgininde Kókpekti aýdanynyń 54 jastaǵy turǵyny boldy.

«Tekserý kezinde júksalǵyshtan 1 qap aqtaban, kókserke, móńke balyqtary tabyldy. Er adamda jalpy salmaǵy 30 kelige jetetin balyqqa tıisti ruqsat qaǵazdary bolmaǵan», - dep habarlady vedomstvo ókilderi.

Aýdan turǵynyna qatysty QR ÁQBtK-niń 383-baby 1-bóligine (balyq aýlaý jáne balyq resýrstary men basqa da sý janýarlaryn qorǵaý erejelerin buzý) sáıkes ákimshilik hattama toltyrylǵan.