ShQO-da 30 gektar aýmaqqa jaıylǵan órtti sóndirýge poıyzdyń kómegi qajet boldy
ÓSKEMEN. QazAqparat – Shyǵys Qazaqstan oblysynda 30 gektar aýmaqqa jaıylǵan órtti sóndirýge poıyzdyń kómegi qajet boldy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, 27 sáýirde Óskemen qalasyndaǵy Ertis ózeniniń sol jaǵalaýynda shóp janyp jatqany týraly habarlama túsken.
Jeldiń saldarynan órt odan saıyn órship ketti. Oqıǵa ornyna órt sóndirý kóligimen jetý kóp ýaqytty alady.
Sondyqtan jeke quramdy jetkizý úshin qaıyqtar iske qosylǵan.
«Qutqarýshylar qosymsha kúsh retinde «Zaşıta» stantsııasynda ornalasqan 11 adamnan turatyn «Qazaqstan temir joly» UK órt sóndirý poıyzyn jumyldyrdy. Olar TJD qyzmetkerlerimen birge qyzyl jalyndy aýyzdyqtaýǵa atsalysty. Ózara is-qımyl men birlesken kúsh-jigerdiń arqasynda 30 gektar aýmaqqa jaıylǵan tilsiz jaý tolyqtaı sóndirildi», - dep habarlady vedomstvo ókilderi.
Oqıǵa ornynda barlyǵy 5 tehnıka, 2 qaıyq, 24 órt sóndirýshi, «Qazaqstan temir joly» UK órt sóndirý poıyzy men jeke quramnan 11 adam jumys istedi.
Esterińizge sala ketsek, osyǵan deıin Óskemende qutqarýshylar shópti sharpyǵan órtti sóndirýge qaıyqpen attanǵanyn habarlaǵan bolatynbyz.
