ShQO-da 3 jaǵajaı ǵana shomylýǵa jaramdy
ÓSKEMEN. QazAqparat - Oblystyq tótenshe jaǵdaılar departamenti Shyǵys Qazaqstandaǵy shomylýǵa jaramdy jaǵajaılardy atady, dep habarlaıdy QazAqparat tilshisi.
Qutqarýshylardyń málimeti boıynsha, óńirde uzyn sany 339 kópshilik demalys orny bar. Oǵan jeke jaǵajaılar men demalys bazalary da kiredi. Tótenshe jaǵdaı mamandary solardyń qanshasy talapqa saı jabdyqtalǵanyna tekserý júrgizgen bolatyn.
«Shyǵys óńirlik aeroutqyr qutqarý jasaǵy men azamattyq qorǵanys mamandary barlyq demalys oryndarynyń shomylý maýsymyna daıyndyǵyn tekserdi. Qazirgi tańda oblys boıynsha 3 jaǵajaı shomylýǵa jaramdy. Onyń ekeýi Óskemenniń Oktıabr jaǵajaıy men Sol jaǵalaý kesheni bolsa, biri Ulan aýdanyndaǵy Shalqar kóliniń jaǵasy. Al Semeıdegi jaǵdaı qıyn. Ertis jaǵasynda shomylýǵa arnalǵan oryn bolmaǵanymen, turǵyndar qaýipsizdik erejelerin ysyryp qoıyp, shomylýǵa qumar», - deıdi tótenshe jaǵdaılar departamenti azamattyq qorǵanys basqarmasynyń basshysy Tımýr Dıdahmetov.
Al áıgili Alakóldiń aýmaǵyn tótenshe jaǵdaı qyzmetiniń arnaıy bólimi tekserip jatyr. Úrjar aýdany ákimdiginiń ótinishi boıynsha bastalǵan tekserý birneshe olqylyqty anyqtapty.
«Búginge deıin kól aýmaǵynda 50-den astam jerge shomylýǵa tyıym salatyn belgi ornatyldy. Qutqarý beketterine 29 adam qaraýylǵa qoıyldy. Aımaq boıynsha 2000-nan astam ózen-kól bar. Onyń bári shomylýǵa jaramdy degen sóz emes», - deıdi departament ókili.
Jyl basynan beri, Shyǵys Qazaqstanda 9 adamnyń ajaly sýdan kelgen. Qaıǵyly oqıǵalar Ulan, Úrjar, Glýbokoe, Shemonaıha, Aıagóz aýdandary men Óskemen, Semeı qalalarynda tirkelgen.
