ShQO-da 3 mlrd teńgege bilim berýdegi ozyq tehnologııalar satyp alyndy
ASTANA. QazAqparat - Shyǵys Qazaqstanda Prezıdenttiń «Rýhanı jańǵyrý» baǵdarlamasyna sáıkes iske asyrylǵan «Meniń mektebim» aktsııasy ózgege úlgi bolarlyq bastamaǵa aınaldy, dep habarlaıdy «Habar 24».
Demeýshilerdiń kómegimen 3 mıllıard teńgege jýyq qarajatqa bilim berýdegi ozyq tehnologııa túrleri satyp alyndy. Nátıjesinde bıylǵy oqý jylynda óńirde tolyq jabdyqtalǵan 277 IT synyp qoldanysqa berildi. Osylaısha, oqýshylar qazirgi zamanǵa saı bilim alyp jatyr.
Olar qazirden-aq aqparattyq tehnologııa salasyndaǵy olımpıadalar men konkýrstarǵa qyzý daıyndyq ústinde.
- Robottandyrý júıesi balalardy óte qatty qyzyqtyrady. Óıtkeni bolashaqtaǵy IT mamandardyń eń birinshi baspaldaǵy robotty tehnıkadan bastalady.Onda balalar programmalaýdy kodtarynan emes, birinshi blok túrindegi daıyn qurylymdarmen jumys isteıdi, - deıdi ınformatıka pániniń muǵalimi Maǵjan Syrymbek.
Jalpy №46 orta mektebi Nazarbaev zııatkerlik mektebimen teń túspese, kem túspeıdi. Bilim oshaǵy 3 tilde dáris berýdi meńgergen. Al robotty tehnologııanyń qyr syryn úıretý úshin 4 muǵalim jaz boıy arnaıy dáris alǵan.
Fızıka, matematıka, ınformatıka páninen daryndylar oqıtyn qaladaǵy mektep-lıtseıi de demeýshilerdiń kómegimen jańa synypqa ıe bolyp, búginde ıgiligin kórip jatyr. Kásipkerler el bolashaǵyna salynǵan qarajat mindeti túrde aqtalatynyna senimdi.
- Bolashaǵymyzǵa ınvestıtsııa quıyp jatyrmyz. Elimizdiń bolashaǵy úshin. Óskeleń urpaq zamanǵa laıyq bilim alyp, keleshekte bilikti maman bolýy kerek. Bul bizdiń mekememiz úshin de mańyzdy, - deıdi taý-ken óndirýshi kásiporynnyń dırektory ıÝrıı Ovchınnıkov.
Óńirde jastardyń tek óz elimizde bilim alyp, qyzmet etýin maqsat tutqan «Bilikti maman» jobasy da sátti iske asýda. Máselen, bıyl mektep bitirýshilerge respýblıkalyq granttan bólek, tegin bilim alý múmkindikteri berildi. 450 túlekke oblystyq bıýdjetten qosymsha grant bólindi, bul - byltyrǵydan eki ese artyq kórsetkish.
