ShQO-da 3 kúnde mas kúıinde kólik júrgizgen 35 adam ustaldy
ÓSKEMEN. QazAqparat – Shyǵys Qazaqstan oblysynda 3 kúnde mas kúıde kólik júrgizgen 35 adam ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 12-18 naýryz aralyǵynda óńir aýmaǵynda «Quqyqtyq tártip» jedel-aldyn alý sharasy júrgizilýde. Polıtseıler kúsheıtilgen rejımde jumys istep jatyr.
«Sońǵy 3 kúnniń qorytyndysy boıynsha oblys polıtseıleri izin sýytpaı 88 qylmysty jáne buryn jasalǵan 53 qylmysty ashty. 5000-nan astam ákimshilik quqyq buzýshylyq faktileri anyqtalǵan. Onyń ishinde usaq buzaqylyq jasaǵan – 627, alkogoldi ishimdik ishkeni nemese qoǵamdyq oryndarda mas kúıde júrgeni úshin – 854 adam jaýapqa tartyldy. Sonymen qatar profılaktıkalyq esepte turǵan 4785 adam tekserilgen», - delingen habarlamada.
Budan bólek, shara barysynda zańsyz aınalymnan 18 qarý tárkilengen. Onyń ishinde 1 uńǵysyz, 14 tegis uńǵyly jáne 3 oıyq uńǵyly atys qarý.
«Kólik quralyn mas kúıde tizgindeýdiń aldyn alý boıynsha júrgizilip jatqan jumystarǵa qaramastan, tek 3 kúnniń ishinde 35 júrgizýshi ustalǵan. Máselen, 13 naýryzda saǵat 00:35 shamasynda «Shemonaıha-Sýgatovka» tasjolynda «VAZ-21140» markaly avtokólik toqtatyldy. Іshimdik iship rýlge otyrǵan 36 jastaǵy er adamǵa qatysty QR ÁQBtK-niń 608-baby 1-bóligine sáıkes ákimshilik hattama toltyryldy, - dedi ShQO PD jergilikti polıtsııa qyzmeti basqarmasynyń bastyǵy Talǵat Nurıev.
Sondaı-aq polıtseıler esirtki zattaryn saqtaýdyń 7 faktisin anyqtap, 0,513 keli esirtkini tárkiledi.
