ShQO-da 3 et kombınaty salynady
Aıagóz aýdany bul jobany túrli kásipkerlik forýmdarda jıi kótergenimen, buǵan deıin naqty ınvestor tabylmaı kelgen bolatyn. Aýstralııanyń áıgili Cedar Meats kompanııasy osy jobaǵa ınvestor bolýǵa nıet tanytyp otyr. Atalmysh kompanııa qazaqstandyq kásipkerlermen «Eýrazııa agroholdıg» atty birlesken kásiporyn qurmaqshy. Aýstralııa tarapy et kombınatyn salyp, mal semirtý tehnologııasyn engizýge mindettelmek. Al kásiporynǵa beriletin jer telimi otandyq kompanııa ıeliginde bolady.
«Bul jaı ǵana et kombınaty emes, tutas bir keshen bolady. Et óńdeý tsehtarynan bólek mal bordaqylaý alańy, jemshóp daıyndaıtyn tseh salynady. Óıtkeni, áıgili brendtiń ónimin shyǵarý úshin mal semirtýde aýstrııalyq tehnologııa paıdalanylmaq. Aldyn ala esepteýler boıynsha, osynyń bárine 9 mlrd teńgedeı ınvestıtsııa qajet» - deıdi oblystyq aýyl sharýashylyǵy basqarmasy bastyǵynyń ekonomıka jónindegi orynbasary Arman Turysbekov.
Al Semeı qalasyndaǵy et kombınaty arnaıy ındýstrııalyq aımaqtan boı kótermek. Bul jobaǵa Irannyń «Agroportal» kompanııasy ınvestor retinde tartylǵan. Indýstrııalyq aımaqqa salynatyn kombınattyń barlyq ınfraquyrylymyn memleket tarapynan tartý kózdelgen. Mundaǵy et ónimderi «halal» standart boıynsha óńdelýi tıis. Joba quny 7 mlrd teńge. 2019 jyly atalǵan 2 kásiporyn da tolyq qýatpen jumys isteıdi dep josparlanǵan.
Úshinshi et kombınatyn Kókpekti aýdanynyń jergilikti kompanııasy qolǵa almaqshy. «Elimaı-Kókpekti» JShS angýs, gereford, qazaqtyń aq bas sıyry tárizdi asyltuqymdy iri qara násilin túrlendirýmen aınalysady. Eginshilik pen mal sharýashylyǵyn qatar damytyp otyrǵan agrónerkásiptik keshen endi et óńdeýdi qolǵa almaqshy.
«Bul kompanııanyń jobasy áli tolyq pysyqtalǵan joq. Qansha ónim shyǵaryp, qansha bas maldy bordaqylaıtyny ázirge belgisiz. Bir belgilisi, seriktestiktiń mundaı jobany júzege asyrýǵa áleýeti tolyq jetedi» - deıdi Arman Turysbekov.
Onyń aıtýynsha osy atalǵan nysandar erteń shıkizattan tarshylyq kórmeýi úshin 2019 jylǵa deıin kórshiles eldi mekenderde 12 mal bordaqylaý alańy qurylýy kerek.