ShQO-da 3 ese kóbeıip ketken sýquzǵyndar balyq popýlıatsııasyna qaýip tóndirý múmkin

ÓSKEMEN. KAZINFORM — Shyǵys Qazaqstan oblysy Marqakól aýdanynda sýquzǵyndar tym kóbeıip ketti. 

Marqakól qoryǵynyń qyzmetkerleri úsh kún boıy kól akvatorııasynda sýquzǵyndardyń esebin júrgizdi. Sonyń nátıjesinde osyndaı qus sany 3 myńnan asyp ketkeni anyqtaldy. Bul ótken jylmen salystyrǵanda 3 ese kóp.

— Bul kúnderi aýa raıy bultty ári jeldi boldy. Qoryq qyzmetkerleri qoryq aılaǵynan motorly qaıyqpen shyǵyp, kóldiń aınalasyndaǵy búkil jaǵalaýdy boılaı júrip ótti. Sýquzǵyndar araldarda, ózender men kólderdiń jaǵasynda jáne sýly-batpaqty jerlerde mekendeıdi. Marqakólde birneshe jyldan beri qazdyń kólemindeı úlken sýquzǵyndar ómir súrip keledi. Túsi kúlgin-jasyl, tumsyǵy ilmek tárizdi uzyn bolyp keledi, — dep habarlady Marqakól qoryǵynan.

Sýquzǵyndar negizinen balyqpen qorektenedi. Sondyqtan ol Marqakóldiń balyq popýlıatsııasyna aıtarlyqtaı áser etedi.

Qustardyń shoǵyrlanǵan toptary ártúrli jerlerde kezdeskenimen, olardyń negizgi uıa salatyn aýmaqtary — Cherepanova omartasy men Gýba ýchaskeleri.

Eske salsaq, osyǵan deıin prokýrorlar 455 keli bekire tuqymdas balyqty zańsyz aýlaǵandardy ustaǵany habarlanǵan.